Qyteti Kolhapur në Indinë perëndimore është gjendur papritur në qendër të vëmendjes globale, ndërsa mijëra artizanë lokalë që prodhojnë me dorë sandalet tradicionale prej lëkure po ndërmarrin një reagim kolektiv kundër markës luksoze Prada, duke e akuzuar për kopjimin e dizajnit të tyre pa u dhënë asnjë meritë.
Tingulli ritmik i çekiçit në punishten e zymtë të Sadashiv Sanake, 58 vjeç, është dëshmi e punës së palodhur për krijimin me dorë të sandaleve ikonike prej lëkure “Kolhapuri”.
“E kam mësuar këtë zanat që fëmijë,” i thotë BBC-së. Një ditë pune del për të prodhuar vetëm “tetë deri në dhjetë palë” të këtyre sandaleve, që shiten me një çmim modest prej $8-$10.
Vetëm rreth 5,000 artizanë në Kolhapur janë ende në këtë profesion – një industri artizanale që përballet me vështirësi për të konkurruar në një botë të mekanizuar, e zhytur në kushte të vështira pune dhe paga të ulëta.
Nuk është çudi, pra, që kur marka luksoze italiane Prada nxori një linjë të re sandalesh që ngjasonin dukshëm me sandalet Kolhapuri – pa përmendur origjinën e dizajnit – artizanët vendas reaguan me zemërim.
Reagimi ishte i menjëhershëm. Rrjetet sociale u mbushën me akuza për përvetësim kulturor, duke e detyruar Prada-n të jepte një deklaratë ku pranonte prejardhjen e sandaleve.
Tani, politikanët lokalë dhe shoqatat e industrisë u janë bashkuar artizanëve që kërkojnë njohje më të mirë të zanatit dhe trashëgimisë kulturore që ai mbart.
Zoti Sanake nuk ishte në dijeni të shfaqjes së Prada-s derisa BBC i tregoi një video. Kur mësoi se sandalet mund të shiten për qindra paund në tregjet e luksit, ai qeshi me ironi dhe pyeti: “A kanë flori brenda?”.
Prada nuk e ka bërë publik çmimin, por sandalet e tjera të saj në Mbretërinë e Bashkuar shiten nga £600 deri në £1,000, sipas faqes së saj zyrtare.
