Rachel Raposas & Erin Clack, People.com
Elon Musk po themelon partinë e tij politike.
Të shtunën, më 5 korrik, themeluesi i Tesla-s dhe ish-këshilltar i Presidentit Donald Trump njoftoi në platformën X se ka formuar “Partia Amerika”.
Njoftimi erdhi një ditë pasi Musk, 54 vjeç, postoi një sondazh në platformë me mesazhin:
“Dita e Pavarësisë është koha perfekte për të pyetur nëse doni pavarësi nga sistemi dy-partiak (disa do të thoshin një-partiak)! A duhet të krijojmë Partinë Amerika?”
Nga mbi 1.2 milionë persona që morën pjesë në sondazh, 65.4% votuan “po”.
Ai më pas postoi një tjetër njoftim në X të shtunën, ku shpalli zyrtarisht nisjen e Partisë Amerika:
“Në raport 2 me 1, ju dëshironi një parti të re politike dhe do ta keni!” shkroi ai.
“Kur bëhet fjalë për falimentimin e vendit tonë përmes shpërdorimit dhe korrupsionit, ne jetojmë në një sistem një-partiak, jo në një demokraci. Sot, Partia Amerika formohet për t’ju kthyer juve lirinë.”
Po atë ditë, Musk shpërndau sërish një meme me një gjarpër me dy koka dhe titullin “Fundi i Partisë së Vetme”. Në përgjigje, ai shkroi thjesht: “Po.”
Të hënën, më 30 qershor, Musk premtoi se nëse Kongresi i kontrolluar nga republikanët miratonte “Projektligjin e madh, të bukur” të Trumpit — të cilin ai e ka kritikuar disa herë — ai do të krijonte dhe financonte Partinë Amerika për të përjashtuar ligjvënësit republikanë.
“Nëse ky projektligj i çmendur kalon, Partia Amerika do të formohet të nesërmen,” shkroi ai në X. “Vendi ynë ka nevojë për një alternativë ndaj uni-partisë Demokratike-Republikane që njerëzit të kenë një ZË të vërtetë.”
